2008 Danpi Rem Maw A Thar Ngan? Pu No Than Kap

0
1024

2008Danpi remtu ding cu Union MP an si, State le Region MP (MLA) an si lo. Hiruangah Danpi rem dingih rak rinsan bik NLD ihsin Union MP cuhtu vote cio a si. NLD sungin Chin Union MP (17) an tlin phah ve.

Himi NLD ih Chin MP (17) hi Danpi rem ding timlamtu (45-member constitution mendment Joint Committee) ah an tel ban ve lo cu ziangtitha! Cutin, Union Hlutdaw MP zate 657 ah NLD cu 390 an kim ih Party dangdang le Ralkap kawm 267 hnakin 123 in an tam (390:267).

Thansonak (Development) buaipi lo le Danpi rem tum lo phah tiangin 21Pinlung koin Remnak thu kum 3 sung NLD cun a buaipi. Kum 3 sungah, Development, Remnak le Danpi Rem – timi thupi (3) ah hlawhtlin mi mumal um lo hmanseh, kum 4 nak talah thlir bikmi le anmai auhla bik 2008Danpi Rem tal hlawhtling ding rorin, dungsip ṭul canah sip, hmainawr ṭul canah nawrin, an feh thiam ahcun, a ziaum zet ding.

Hmanseh,
Tui Danpi remdan thu ah, NLD rem duhdan le USDP le Ralkap duhdan a bangawk theilo tikah, ziang pipa rem thei loin an um pang ahcun a tuartu ding bik cu kanmah Tlangmi kan si. An ninum, thin an ti tawi, beidawngza an si fawn. Hivek hnuaihni hnak cun, NLD hin Union MP ih an mipum tamnak hmang lawlaw in, Danpi hi a pumpin thleng lawlaw tum hai sehla a fel, a awl in a hnakhat sawn ding.

A umzia cu:
2008 Danpi sungin thu pipa cin rem ding ah, Art. 436 ih ngan bangin Union MP 76% in an lungkim hnu hmanah ram pumpi vote pe thei 50% luanin lungkim lawngah rem theih ti a si. A awl lo. Curuangah, a bupi ih thleng tum lawlaw hi a awl sawn ding tin Dan thiam pawlin an tinak a si. Cutin thleng thei ding cun, 1/- Union MP pakhat in 2008 Danpi cu hman tlak a si lo thu (Eg., Federal Democracy Danpi a silo thu) Hlutdaw ah a thunlut ding.

2/- Thu thunluh (motion) a si ruangah Union MP 51% in an lung kimpi a sile a thu a hlawhtling. Cuihnuah,

3/- Ram pumpi duhdan lak a si ding. Danpi thar nei duh Mipi an tam sawn a sile a thar ngan a si ding (An tam sawn ding ti rel ngam a si fawn).

Danpi thar ngan sung vial 2008 Danpi cu a langten hman peh a si ding ih a thar a suak veten hlawn a si ding. Cui hnuah, Danpi thar ngan vekin Hrilawk tuah ih Cozah thar din a si ding. Asile, Ziang ah hi tluk awlte nan thleng tum a si hrih lo timi thu ah hmuhdan 3 a um:

1- Ralkap in uknak a laksal an phang (An lak a zumum lo).

2- Himi thu thunlut ih hlawhtling ter theitu Union MP tam bik neitu NLD in, Ralkap thlem thluk hmaisak thupi sawn ah an ret (An thlemthlu thei hrih fawn lo).

3- Danpi thar neih an Duh taktak lo (Hihi theih ban a silo. *A san cu, Danpi thar tuah zik bang sehla Tlangmi duhdan 50% tal a si a ṭul dingih cucu NLD lala khalin Kawl policy lole duhdan kalhin a fehpi ngam pei maw? *A feh teh a feh duh taktak pei maw?)

Ziang khalle,
“Uipi tilian thlir” in kan rak thlir cuahco hrih poh a si kei cu!
Cepa thang ih awkaw talaileng vek kan sisi.. Ziangtitha!

 

LEAVE A REPLY

Please enter your comment!
Please enter your name here