Chief Minister Kha Nun In Sim Sak Aw: Letpanțawng Mipi

0
347

Sagaing ramțhen Chief Minister kha nun in sim sak aw tiah Letpanțawng darsen project mipi pawlin rampi thuron petu Daw Aung San Suu Kyi le Monywa mipi tonkhawmnak ah signboard keng tahratin an rak dil.

Daw Aung San Suu Kyi cu tuizing March 8 zinglam suimilam 9:00 ah Monywa senpi inn ah mipi tong in thurel tlangnak a nei.

Daw Aung San Suu Kyi ih mipi tonnak a neih caan ah Letpanțawng hmun ram ih um Vuat-hmi (ဝက္​​ေမွး) khua ihsin Ma Tuaih Tuaih Win cun mipi ai-awh in “chief minister hi Letpanțawng mipi thawn tong aw dingin in sim sak aw, kannih ih sim ahcun zianghman ka hnenah ra sim hlah uh in ti, Letpanțawng țuanvo neitu sinpi tlangbawi khal nun in sim sak aw” tiah Daw Suu cu dilnak a nei.

Cutiih an dilnak cu Daw Suu in “nunsim ding ti ahcun nan zaten nunsim ding nan si, nan duh dandan in nan nung thluh, Letpanțawng thuhla ah company khalin daan a thluh lo, a sungih tlanglengtu mipi khalin daan nan thlun lo, nan zaten ka lo mawhthluk, ka hnenah zianghman ra sim hlah uh tiih chief minister ih a ti cu a mawh, asina’n amah thawn a pehpar lo mi thuhla nan thlen ahcun zianghman a țong in a sim thei lo ding” tiah a let.

Letpanțawng mipi 100 hrawng cun Monywa senpi inn hmai ah “acid rimnam pawl le kiangkap siatsuahtertu darsen project hi rampi sal sungih in luttertu a si, daan le dun thlun lo darsen project ruangah mipi harsatnak kan tong” ti’n signboard keng tahratin an rak um.

Daw Aung San Suu Kyi cu Letpanțawng darsen zingzoitu committee chairman țuanvo kaitu a siih Letpanțawng darsen thuhla ah 2013 ihsin tuini tiang mipi le company karlak ah theihthiam-awknak a um hrih lo tiah theih a si.

Letpanțawng darsen project cu Sagaing ramțhen Salingyi peng sungah a um ih Myanmar ram ih U Paing company le China ram ih Vuanpawng company kom aw-in țuantlangmi project pakhat a si. Ref: CNM

 

LEAVE A REPLY

Please enter your comment!
Please enter your name here