Chin MP: Hnatuan Theidan by Pu No Than Kap

0
947

– Central ah Kawl party pi a lal thotho ahcun, party fate Chin party ihsin MP cuhtu cun, hrilawknak ah tling ve hman sehla, ṭuan theimi taktak a nei lo ding, ti a si. Hivek ruahnak nei hi an tam nawn hmang.

# Theih ding ah, Union party kan ṭul kan ti hman ah, an party sungah lut kherkher lo khal in, rualpi (alliance) in anmah thawn hnaṭuan tlang a theih ringring.

# A thupi sawn cu, Chinmi pakhat in amai Chin phunhnam party ihsin MP cuhnak cang a thiam ih MP a si veten, rel rero ṭul loin hnam dang pawl in an upat in an zah cia, a thusim mi khal an pawmpi, ti a tak in kan hmu. Phunhnam zawng ih zah le upat tlak miphun kan sizia langter kan thiam a thupi bik.

# Mipi tam sawn in kan ruat tel ṭheu lomi a um: Cucu, # MP kan si ih Hlutdaw kan thlen veten, kan umnak party hnakin, kan dinnak bial (constituent) thupi sawn ah ret a si.. timi hi a si.

Ṭhimnakah,

– Falam peng ihsin Pithuh Hlutdaw MP Pu Khuang Ling in Hlutdaw ah thu a sim tik ah, “CPP ih Pu Khuang Ling in thu a sim ding” ti a si lo, “Falam peng aiawh MP pu Khuang Ling in thu a sim ding,” ti a si. Party hmin rel tel a si nawn lo.

– Hiruangah, Party a hlo tinak si loin, mai dinnak bial “mipi aiawhtu palai sinak” thupi ah ret sawn a si.

# Democracy ram ah, party phunphun din theih a sinak san cu khat le khat ral bangin zohaw in do awk rero a ṭul ruangah a si lo. Ram le miphun hrangah ruahnak le hmuhdan phunphun suakter in, zawi ruahnak le hmuhdan a ṭhabik ti in a ṭhalam ih zuamawknak neih duh ruangah a si sawn.

Curuangah, – Himi theithiam cin cun, Kawl party tumpi a si khalle Chin party fate a si khalle, mipum an tam le mal a zohsak nawn lo, an dinpimi thu a ṭha maw, Chin *miphun damnak* thu an keng maw .. timi a zoh sawn, a bawm sawn, a dinpi sawn.

Theih dingmi cu:

# 2008 Danpi Tlangmi duhdan Federal thlun in *remṭhat a si hlan, tui dinhmun* hman ah, Chin State in Union MP (21) le State MP (18) a neih mi khi an zaten Chin party si thluh bang sehla;

# Chinram le Chin mipi hrangih an hnaṭuan thei dan ding cu, *tu hnak ih let in a si lo hman ah, *tu hnakin a niam cuang hrim hrim lo ding. Himi a dikzia cu zoh uhla: – Mai tualto party cahnak Zakhaing ram in, CM an ngah lo cing in, Kawl party cahnak Chinram tlukin Central in an tlon ih sumsaw an vur natsat dan khin a theih theih.

# 2008 Danpi remṭhat a si hnu tla cun, rel ding a um lo.

# Cun, Chin state lenglam Sagaing ramṭhen sung hman ah, 2008 Danpi remṭhat hlan tui dinhmun hman ah, Chin party ih tling MP in a mai tlindan ih zir in, hna a ṭuan thei thotho. A hrangih thupi bik cu zalen zetin khuaram thu a sim theinak Chin party ih a um kha a si. (Kawl party ahcun zalen zetin thusim a theih lo ti zapi theih a si).

Ṭhimnakah: 2010 in 2015 ah, Sagaing Hlutdaw ah MP 101 kan um ih Chin party in keimah lawng MP ka rak si. Asinan, kum 5 sungah, Vuanci ka sinak tel lo, MP ka sinak ih Hlutdaw ih thu ka bur mi (motion) hlawhtling lo a um dah lo (Hlutdaw ih thuburmi Record zoh theih a si).

Himi ihsin a fiangmi cu:

(1) Hnamdang party tumpi in, an hnakih fate Chin party MP ka si ruangah, ka thu an dokalh phah cuang lo. (2) Ka umnak CPP hnak in, ka thu simmi le ka thuburmi zoh a si sawn. (3) Ka umnak Chin Party ah (Kawl party tumpi vek si loin) khuah khirhnak um loin, zalen zetin thu ka sim thei. (4) Hnamdang party tumpi ah um bang sehla, an khuahkhirhnak hnuaiah ziang pipa ka sim thei lo ding ti, rualpi MP (100) rual umtudan zoh in ka sim thei. (5) Hnamdang party tumpi ih um tik ah, ziangvek lal tohkham sang ah to in, ziangvek MP kan si khalle, in duhsaknak cu an thu awihter tumnak in a thlun ring ring ih, an thinlung taktak ih upat mi kan si dah lo.

 

LEAVE A REPLY

Please enter your comment!
Please enter your name here