Chinram Paletwa khawpi ah Fang Phurh lut An Khap

0
404

Humhimnak lam thuhla ruangah Chin ramkulh thlanglam Paletwa khawpi ah fang phurh khap/sianlo a si thu Paletwa peng senpi tlangsuak palai U Sein Aung in simnak a nei.

“Fang a cem/umlo timi thuhla ah humhimnak lam thuhla ruangah ralkap le uknak lam hruaitu pawlih tawlrelmi a si” tiah U Sein Aung in a sim.

Asina’n fang a țul asi ahcun peng uktu ih theihpinak ca thawn fang phurh theih a si thu simnak a nei.

Chin ramkulh thlanglam Paletwa khawpi kiangkap ah Arakan Army (AA) le ralkap karlak ah do-awknak a um ih do-awknak hmun pawl cu Paletwa thawn a naih aw zetmi Rakhine ramkulh saklam Kyaukdaw, Mrauk Oo, Yatihțawng le Pukkanchun khawpi pawl ah a darh aw.

“Fang a um nawn lo ti cu a sina’n zum hnakin a harsa tuk lo, mai in-ei ding cu a um ko, fang man cu malte a kai deuh” tiah Paletwa khawpi ih zatlang pawlkom hotu U Wai Dan in simnak a nei.

Paletwa ih lutmi fang a tam sawn cu Rakhine ramkulh saklam Kyaukdaw khawpi ihsin phurh lutmi a siih fang phurh thei dan rikhiah a si ruangah khua mipi ih ei tlangpi fang man hi dipkhat ah 30000 tlunlam tiang a kai.

“Fang phurh dan malte rikhiah a si tikah thilri phurtu pawlin malte man kai in an zuar” tiah U Wai Dan in a sim.

Arakan Army (AA) le ralkap karlak ih do-awknak ruangah Chin ramkulh thlanglam Paletwa, Rakhine ramkulh Butițawng, Kyaukdaw, Pukkanchun, Yatihțawng le Mawngdaw peng pawl ihsin raltlan mipi 33000 lenglo an um tiah OCHA in tlangthannak an nei.

Ref : Mizzima

 

LEAVE A REPLY

Please enter your comment!
Please enter your name here