Iran in Uranium Ser Bet A Tum

0
792

Iran Nuclear Agency cun Iran parih dan an tuahmi Uranium filter Kg 300 lanin, a hnakih tam a tuah thlang ding tiah June 17 ni ah Arak nuclear power plant ih thu an relkhawmnakah thu an suahpi. Hi Kg 300 hi kan dung lamih Iran le ram dang ram 6 (P5+1) pawl remawknak a si ih, tu ihsi ni 10 sungah himi an rak remawk nak hnakih tamin, nuclear tuahnak ding hrangah uranium thianghlim hi a tuah bet sal ding. Hi hi an remawk ihsi daan a pahbal voi khatnak ding a si, tiah VOA thuthang latu Edward Yeranian cun a rel.

Iran cun Uranium a tuah dan cu a let li in a tuah thlang zik ih ruangah June 27 ah cun P5+1 pawl thawi an remawknak hnakih tam a nei thlang ding. Cui’ hleiah an tifim dan kha tui hlan hnakih rang sawnin ṭuan an tum tiah Nuclear Agency ih an hotu Behrouz Kamalvandi cun a rel.

American hin nikum 2018 November thla ihsi khan Iran hi a hrek sal. 1979 Iran Revolution hnu ih President hung tuan hmaisa biktu, an ram hruaitu hlun Abolhassan Bani Sadr cun tu ih an Supreme Leader Ayatollah Khamenei kha hi tu ah hin dinhmun laklawh tak tak karlakah a um, a ti.

“President Trump ih hrêknak rak dokalh ve dingin ziang tal simaw cu kan tuah ve a ṭul timi hi Irag Nuclear Agency hin Irag mipi pawl theihter an tum cu a si ko. Sinan, Iran hin hril ding tampi a nei lo. 2015 kumih remawknak kha a pahbal ngai ngai pei maw, ti hi ruah ding a um. Ziangah ti le, a ti ngai ngai a si ah cun ram dang mithmaiah Iran hi a mah lawng lawng a si thlang dingih, cui’ hleiah UN Security Council lamin tla an hrêk bet pang ding ti a phan um zet.”

Kan dung naiih Karzakhstan ramih thu relkhawmnakah cun Iran President Hassan Rouhani cun Russia President Vladimir Putin hnenah, “2015 kum remawknak cu an thlun lai ding thu” cu a rak ruah zo tiah Iran lam ihsi zingzoitu Ali Nourizadeh cun a rel. Iran ih ral tumbik a si mi Israel Prime Minister Benjamin Netanyahu cun, remawknak hnakih tam a ser a si ahcun ram dang pawlin hrêk ciamco ding a si, tiah a rel ve.

Iran in Nuclear sernak ding hrangih tulmi Uranium ka ser bet ding a ti hi kan dung naiih Oman Gulf ih lawngpi pahnihin donak an tawn hnu, ram khat le ram khat karlak thu a hung san vivo hnu ih a relmi a si. Hi lawngpi donakah hin US cun Iran cozah a puh lawng si loin an vedio file tiang a suah. Culaiah Iran cun, hi thuhlaah zianghman kan telnak a umlo, an ti. VOA News.

 

LEAVE A REPLY

Please enter your comment!
Please enter your name here