JUSTICE BRETT KAVANAUGH CONFIRMED, AMBASSADOR NIKKI BANG

0
865

1. Brett Kavanaugh Confirm: US Supreme Court Justice dingah Brett Kavanaugh (53) cu US Senate in 50- 48 in an confirm zo. US Supreme Court 114 nak si dingin Inrin zan an confirm hnu nazi hrek ah thutiam a la zo. Cun thawhṭan zan khan White House ah lakluh khawmnak an nei sal. October 9, thawhlehni ihsin Bench ah toin Case a ngai thawk ding.

Ziangruangah hitlukin Democratic le Liberal Pawlin an Dodal? Judge nemhngeh thu ah Senate ṭuanvo cu thurawn pek le lungkimpi (Advice and Consent) a si ih tui hlan ah lephei cun ‘Kaa” thawn ‘nan lungkim maw’ tiawk men a rak si ṭheu. Neta ah Party line in Liberal le conservative an dirhawk tikah thuhla a harsa deuhdeuh. 1937 ihsin US Supreme Court cu Liberal lamah a rak awn deuh.

Tunai ah Conservative 5-Liberal 4 vek a rak si nan Anthony Kennedy cu Social Issue ah Liberal lam a rak tan ṭheu. Anih hi 1987 ih Ragan hril mi a rak si nan 2015 ih Same-sex neihawk khal duhtu a rak si ruangah Liberal pawlin an duh zet. June thla ih a ban tikah President Trump ih ruat mi cu zokhal a sile Conservative a si dingih Liberal-pawlin nasa takin an dodal ding ti an phuang cia. Senate Democratic Leader Chuck Schumer khalin, ‘Hmanrua zate thawn kan dodal ding” a ti cia.

Cutin Brett Kavanaugh ruat a si tikah American Bar Association timi thuṭhentu le dan lam pawlkawm cun Kanavaugh cu ‘Mi thiam hleice, midik, miṭha, micungcuang” tiin an fak. Party pahnih ih fak a hlawh. Tui hlanah hivekih ABA ih rikomen cu relbuai lem loin an nemhnget mai ṭheu. Asinan Senate Judiciary Committee an to thawk ihsin thu ṭha rel thei lo dingin Democratic Senator-pawlin an dodal. Committee in an nemhngeh zik nazi 11 duh ah Ms. Ford in 1982 kum ah mi pawngsual a rak tum a ti. A hmun, a can, ziangtin, zo thawn, ziangtin a fehih a tlung ti khal a theih lo mi cu, cun tetti 3 a rel mi in le, ‘cuvek kan thei lo’ timi cu Democratic pawl cun ‘za ah za rin tlak’ an ti ih bang dingin an nawr ciamco. FBI in zingzawi seh an ti ruangah an zingzawi ih a sualnak an hmu cuang ta lo.

Democratic pawl tumtah bik cu thuphan thawn puh ih nemhngeh lo kha a si. A san cu Conservative Judge pawl cun ‘Dan” vekin thu an ṭhen ṭheu ih Liberal Judge pawl cun ‘Human rights, civil rights le social justice’ thlunin thu an ṭhen ṭheu. Cun Trump hlawnih thawng thlak an duh ruangah Supreme Court ah dan vekih amah ṭantu umter an duh lo.

2. NIKKI HALEY BANG: America ih UN Ambassador Ms. Nikki Haley cu rinlopi in a bang. Anih hi Trump Administration ih mipi duh zet le Trump policy ṭan eueutu a si. US Politician lakah duhtu nei tampi a si ih Republican le Democratic lakah duhtu an tam zet. Ahleicein Republican Conservative a si cingin Democratic lakah Nancy Pelosy le Chuck Schummer tlukin duhtu an tam. Israel a ṭan ih Iran, Russia le China pawl a nawrnak ah a cak zet. North Korea thu khalah a ṭangkai nasa. US President dingah ti thawm a ring nasa. A pale hi India, Punjab lam mi an si ih 1969 ah US an lut ih anih hi 1972 ih piang a si. Methodist mi Michael Haley thawn 1996 ah an neiaw ih fa 2 an nei. Tu cu Methodist ah a um. US Ambassador a ṭuan hlanah South Carolina Governor a ṭuan. Mizan a ban vete in Trump thawn White House ah Media Conference an nei ih 2020 ah President na cuh pei maw? Timi thusuhnak cu, “Cuh lo ding Trump ka bawm ding” a ti. Ziangruangah a bang ih ziang a tuah ding ti a sim hrih lo. President Donald Trum cun “Ziangkim ah kan lung a awi ih kan hlim zet, asinan nang kan lo hloh ding hi cu kan hua tuk lawmam” tiah Nikki a ui thu a sim.

3. Midterm Election ah zoha US Congress control Ding?: November 6 khi US Midterm Election ding a si. Senate 100 lakah 33 le House 435 an zate hril an si ding. President in kum 2 an ṭuan hnu ih Midterm Election ah hin President party si lo hin nehnak an co tlangpi ṭheu. 2010 kum Obama sanih Midterm ah tla cun House ah 60 leng lo Republican lamah a thawnaw a si kha.

Tui kum khal hi Democratic lamin an hrut nasat zum a si. Poll netabik ah cu Democratic in +9 in hmai a hruai. Tu ah RealClearPoll ih rel dan ah cun House ah Dem 205 –GOP 198 hrawng an ngah hmel ih Seat 32 cu zoha ngah deuh ding ti a theih theih hrih lo. Kan dung thla hnakin Republican lam 11 in an ṭhangso. House ih Majority dingin seat 218 a tul. Democratic lamin neh neknek dingih Media pawl rel ṭheu hi ziang a bang pei?

Senate lam zoh cu GOP lam boruak a ṭha nasa lai. US Politics ah cun House hnakin Senate in pawimawhnak tampi a nei. Federal Top Officer, Federal Judge, Cabinet Minister, Budget, tivekah Senate lungkimpi a ṭul ruangah a si. Tu netabik Poll ah Republican 49 (46 safe, 3 likely), Democratic 44(37 safe, 7 likely or lean) an si. Battle field hi Seat 7 an si. Hinah Democratic 5 le Republican 2 in Democratic in hmai an hruai. Hi doawknak seat 7 ah hin Republican in seat 1 te an neh cun 50-50 an si dingih Vice President vote thawn Republican in Majority sinak an co ding. Tu dinhmun ah cun Republican in seat 2 an lak hmel. A san cu Judge Kanavaugh confirm-nak ih Democratic cangvaih dan a mawi lo tuk ruangah Republican lam dinhmun a ṭhangso nasa. Jed Zuala Cawnghlut

 

LEAVE A REPLY

Please enter your comment!
Please enter your name here