Kawl Ralkap le AA Ruangah Paletwa Peng Khua 8 A Siat

0
1335

Kawl ralkap le Arakan Army (AA) do-awknak ruangah thlanglam Laitlang Paletwa peng ih Kha Mawng Wa khua tel in khaw riat a siat ih khua mipi pawl cu hmun nai khua le sungkhat hnenah an beu thu theih a si.

January thlacem ahkhan Kawl ralkap le Arakan Army (AA) do-awknak ah Kawl ralkap cun vanzam hmang tahratin bomb a den ruangah khua siat thluh in khua mipi cu beunak hawlih an vahvaih thu Kha Mawng Wa khua ih mi pakhat cun simnak a nei.

“Kan tlansuannak bik cu vanzam thawn bomb an den ruangah a si, atu hi inn a um nawn lo, ziang ti zawng khal ih umnak ding um nawn lo dinhmun a si, hi khua ih kan um hi kan innsang, kan u, kan nau thawn nuam zetin kan nung, hna kan țuan ih kan ei, kan in, atu cu kan inn pawl tlansan in hmundang ah beunak hawl ih um țul dinhmun ah kan cang” tiah Kha Mawng Wa khua ih mi pakhat in a sim.

Do-awknak ruangah Kha Mawng Wa, Kin Tha Lyn, Khaw Sa Chawng, Ku Chawng Phia, Sah Tin Wa, Phui Laih Wa, Pyi Țawng, Thayagone khua pawl a siat ih khua mipi 1000 hrawng cu Paletwa peng Chiohdaw le Bangladesh lam ah beunak hawl in an vahvaih thu a sim bet.

Paletwa khawpi lam ih beunak hawltu pawl cu kiangkap sungkhat hnenah ret tahratin harnak tongtu beunak hmun tawlreltu dinhmun in hmunkhuarnak tuahsak a si lo thu raltlan mipi bawmtu Ko Tin Htun Aung in simnak a nei.

“Paletwa ih um kannih Rakhine miphun pawl hi Rakhine khua ah hmun kan khuar, Chin ramkulh acozah in dik ten in zoh thei lo tikah kanmah le kanmah kan bawm aw, hmun khuarnak ram kan pe aw, khua hmin cu rel a thiang lo ding, ziangahtile a pehparmi pawl ra in an ra hringhro pang ding, nannih pawl hi mah khua ah tlung ding tivek khin, curuangah raltlan ih beunak hawltu hmun khuarnak khua cu sim-awk a remcang lo” tiah Ko Tin Htun Aung in a sim.

Ralkap thuthang dik thannak lam sungțuan Bohmuchuk Zaw Min Htun cun ralkap dinhmun in Paletwa peng sungih do-awknak ah vanzam le bomb hman a si lo thu VOA ih interview ah simnak a nei.

Atu hi Kawl ralkap in thlanglam Laitlang ah ralkap thazang a bet sinsin ih do-awknak hi a nasa sinsin pang ding a phan um zet. Ref: Khonumthung

 

LEAVE A REPLY

Please enter your comment!
Please enter your name here