Khabib kha ka zumvek a rak si lo; Conor in Khabib a nehlo thu a sim

0
463

Conor McGregor cun Khabib Nurmagomedov a nehlo ti cu fiang zetin leitlun mipi ih theih a si bangin amah Conor rori khalin a nehlo timi hi a pawm ve a si. Conor cun Khabib hi niam tukah a rak ret ih, awlsam tukih neh dingin a rak ruatawk ruangah timtuahawknak fumfe zetin a neih lo ruangih cangsual a si thu a sim. An tongaw lehsal (rematch) asi ahcun timtuahnak ṭha zet nei in a cangsual nawnlo ding thu khal a sim.

Conor hin Khabib kha leihnuai (zial parah) cak hman sehla ding veve ih thongawk ahcun awlsamte ih a neh ding a rak zum tuk ruangah zianghman ih a rak siarlo nak a si. Asinan an vun beihawk ngaingai tikah a rak rin-ai in Khabib a rak cak ih duhvekin Conor sawn in a tham ngah thei lo.

Khabib le Conor an sualawknak UFC 229 ah khan Conor hin Khabib cu a tuarlo deuh, a nehlo rori ti cu a fiangih, ding veve ih an thongawk khalah a neh lo ih, Khabib in wrestling ih a beih khalah Conor in a tuar cuanglo, duh tawkin a sawp ciamco men ih an thlauawk dan a theihtheih zet.

Hi an thongawkmi thlirsalnak ah Conor cun hitin a sim, “Pomawk le phet thlu aw (wrestling) hlir ih sualawk dingah ka rak ruat ih, leihnuai lam ih ṭanlak dan ka rak zir tuk deuh ih Ding ih thongawk lam kha ka rak thlahdah deuh pang a si. Khabib ih misualmi pawl zoh tikah wrestling lam deuh hlir a si ruangah wrestling lampang duh-am deuh ih ka rak timlam ih Ding ih thongawk lam ka rak thlahdah deuh ruangah, ding ih thongawknak ah ka cangsualnak a si” tiah a sim.

 

LEAVE A REPLY

Please enter your comment!
Please enter your name here