Kum 2 Chhung Chenna Neilo A Khawlaia Khawsa Tawh Chu A Chhungte Nen Christmas Ah An Inhmu Leh Ta

0
811

Pathian thil ruahman hi a va han ropui teh lul em. A tan chuan Christmas chu a hun tawn tawh a zawnga chhinchhiah tlak ber a ni hial ngei ang le.

Chenna in pawh nei lo a khawlai a hun eng emaw chen lo hmang tawh, Northern Moor, Manchester kawtthler a lo khawsa thin Declan tih hmingpu chu a chhungte lak atanga kum 2 dawn a bo hnu ah Lal Isu lo pianhun cham Christmas ah chuan a chhungte nen dam takin an inhmu leh ta.

Declan hian a chhungte a hmuh leh theihna chhan chu Siobhan Foran, 32 tih hmingpu vang liau liau a ni. Siobhan Foran hi a fate nen chuan Declan hnen ah hian an khawngaihna lanchhuah tir in thuamhnaw ilo vel chu a taksa tih lumna turin an lo pe.

Siobhan Foran hian Facebook lam ah chuan thlalak vel a phochhuak a, mite hnen ah chuan kawrlum, lukhum leh mawza vel te chu an khawngaihna lantirna a tan pe ve tura ngenin a lo sawm.

Facebook Post a siam hnu reilo ah hian hmeichhe pakhat chuan a Post a hmuh rual in a rawn be pawp nghal a. He hmeichhia hian Declan vahnu (niece) hi niin a inchhal. Declan chu kum 2 lai a bo tawh a, dementia a nei a, a bo atang an lo zawng nasa tawh hle a ni tih a hrilh.

Hetiang hian kum 2 chhung zawng kha kawtthler ah a cheng ang tih a ngaihtuahphak loh reng reng thu Siobhan chu a lo hrilh. Siobhan hian Manchester Evening News hnen ah chuan Declan chu mi tha tak a nih thu a sawi a, mite hnen ah pawisa a dil ve ngai lo a, hlim taka Christmas lo herchhuak chu hmang theuh turin a lo duhsak zawk a ti.

A chhungte hi Oldham lam mi ni a, Declan hian Siobhan hnen ah hian Oldham ah chuan fanu a neih thu sawiin zawnchhuah a duh thu a lo hrilh tawh. A chhungte lam in an biak hnu hian chanchin lawmawm chu Declan hnen ah hian a thlen ta a, Declan pawh tunah chuan a chhungte kiangah hlim takin hun a hmang tawh a ni. A Christmas lo hman tawh a chhinchhiah reng tawh tur thil, theihnghilh tawh loh tur a ni ngei ang le.

DM

LEAVE A REPLY

Please enter your comment!
Please enter your name here