Ralkap In Vanzam A Hman Ruangah Raltlan Tam Deuhdeuh

0
207

Rakhine ramkulh Pukkacun peng Tawphiachawng hmunram Buktaw khua kiangkap tlangtluan ih Myanmar ralkap in vanzam hmangin bom a thlak ciamco ruangah Buktaw khua mipum 300 lenglo cu kiangkap a nainak khua ah himnak hawlin an khua an suahsan thu khua hotu in simnak a nei.

“Mani kha ralkap in vanzam pahnih hmangin zaanlam suimilam 2:00 ah veikhat, suimilam 4 ah veikhat ti’n veihnih an do, bomb an thlak, meithal thawn khal an kap, kannih khawleng ah ka lu hmang kan dak ngam lo, kan țih tuk, bom ih ngah lo dingih tuahmi khurah kan relh thluh, cutin an do-awk cu khua ih nitlaknak lam ih um U Hla Htun Sein inn ah cerek a tla ih in tlunkhuh a ngah, cun U Thein Htun Hla inn khal malte a siat” tuah Buktaw khua hotu U Kyaw Hlaing in simnak a nei.

Cuti vek ih khua kiangkap tiang bomb le cerek a tlak ruangah khua mipi cu um ngam nawn loin kiangkap khua le ram ah himnak hawlin khua suahsan a si timi khal a sim.

“Atu Yuthasuk khua Pyinma phungki tlawngah mipa, nunau, nauhak mipum 260 an um, khua dangdang khalin an ra thleng, Zuatngiuțawng khua ihsin mipum 30 hrawng an ra thleng ih Maw khua, Sawngțu khua khalin minung an ra thleng, mipa hrekkhat cu inn an kil ih khua ah an tang” tiah Buktaw khua hotu in a sim.

Pukkacun peng Tawphiachawng hmunram Buktaw khua kiangkap ahhin Myanmar ralkap le Arakan Army (AA) cu March 6 ihsin do-awk an thawh thu, March 11 ihsin Myanmar ralkap in vanzam a hman thu, March 12 ahcun vanzam hmangin bomb a thlak ciamco thu an sim.

An do-awknak hmun hi Sinti, Buktaw le Miathle khua karlak tlangtluan ah a si thu, mani ahcun Myanmar ralkap in hmunthum ah bomb a thlak thu, veikhat an do-awk ah minute 25 an rei ih veihnih thum bomb thlak in cet meithal thawn an kah-awk ciamco thu Sinti khua mi pakhat khalin simnak a nei. Ref : NRJR

 

LEAVE A REPLY

Please enter your comment!
Please enter your name here