Ram 19 Hrawng In Naypyidaw Ah Embassy Office Țhawn An Duh

0
425

Naypyidaw ih ambassador zung leiram ah embassy office ong dingin ram 19 hrawng in dilnak an thehlut ih ram 3 hrangah leiram lungkimnak cakhen tuah a si zo tiah Naypyidaw sipin committee sungtel U Min Thu in simnak a nei.

“Naypyidaw ah embassy office ret dingin lungkim zo mi ram 3 cu Bangladesh, Malaysia le Brunei an si, Brunei ram cu leiram thleng aw dingin tawlrel a si, Malaysia le Bangladesh cu leiram lungkimnak cakhen tuahnak a rei zo, Gata ram hi lungkimnak tuah dingin ca thehlut a si” tiah U Min Thu in a sim.

Naypyidaw ih Ambassador zung leiram diltu ram 19 hrawng an um ih leiram la dan khal ram hrekkhat pawl cu leiram um zat hnakih tam in diltu an um tiah theih a si. Dil bet mi ca pawl cu atu ahhin a pehpar mi tlangbawi zung in a tawlrel sak tiah theih a si. Acozah ih tawlrelmi cu a tam bik leiram hmun 5 cakhen theih a si. Leiram hmun khat ah Ekah 5.74 a kau ih zung sungih leiram zaten hmun 120 a um tiah theih a si.

“Embassy office țhawn ding hi fiang ten theih a si hrih lo, himi cu a pehpar mi tlangbawi zung ihsin leiram pawl, ambassador zung hrangah tawlrel sak uh ti a si ruangah tawlrel sak mi a si, a dang cu fiangfai ten theih a si hrih lo” tiah U Min Thu in a sim bet.

Naypyidaw Dikkhinatiri peng ih ambassador zung cu a liamzo mi acozah san ah țuansuah a siih Ekah 1550 a kau. Yangon hram bun ram tinkim embassy off cu Naypyidaw ih țhawnnak hrangah rampi in policy a tuah ih ambassador zung țuansuah khal ah ram tinkim ambassador pawl cawlh hahdamnak hmun le ramtamhuap tlawng pawl ong dingah ruahmannak a nei.

Atu Myanmar ram sungah ram tinkim ihsin embassy office 35 le consular chief governor office 6 a um tiah theih a si. Ref: KMD

 

LEAVE A REPLY

Please enter your comment!
Please enter your name here