Tlawngta Pawlin Nasazet In Sahlah Nat An Tuar

0
293

Sagaing ramțhen sung khaw hrekkhat le khawpi sung boarder tlawngta pawl cun Sahlah (Chickenpox) nat cu nasazet in an tuar ih ramțhen harhdamnak lam zung cun a hmun ah feh in natnak karhzai lo dingin an tawlrel thu theih a si.

Hi natnak cu January 21 ihsin ramțhen harhdamnak lam in thuhla theih a siih a hmun ah feh tahratin dam lo pawl tuamhlawmnak an nei. Atu ahcun natnak hi karh ciamco lo in a um hrih tiah January 27 ah Dr. Kyaw Thu Shwe in simnak a nei.

Sahlah natnak cu Kani peng Ngiawng Thu Hmia khua ihsin tlawngta mipum 60, Buhthalin peng Layme khua ihsin tlawngta mipum 68, Pyinlebu peng Helyathua khua ihsin mipum 21, Depeyin khawpi ih boarder tlawngta mipum 19 an si. Sahlah nat tuartu zaten mipum 168 an siih, tuini tiang ahcun a thi le hlo an um hrih lo tiah harhdamnak zung in tlangthannak an neih thu theih a si.

“Hi Sahlah (Chickenpox) ruangah mithi cu an um lo, ninga hrawng a kim cun a hlo lehsal, taksa a bol, hnaisia a suak ih a zaa ruangah kheuh asile dam lonak nathrik dang a kai ding timi a phan um zet, boader le tlawnginn tivek cu suan-awk a olte ruangah a rang thei bik in harhdamnak zung lam kan sim thei lohli” tiah Dr. Kyaw Thu Shwe in a sim.

Sahlah natnak cu Varicella Zoster tiih kawhmi DNA virus ruangah a cang mi a siih natnak tuartu cun awm-na, raibur, thawthawtnak ihsin midang a suan thei, cuihleiah thilri hmanmi khalin a suan thei tiah theih a si.

January 25 hnu lam cun a burbur ih nat a um nawn lo, cun tlawnginn khal khar a si. Hi natnak tuartu zatek 90 cu kum 4 in kum 10 karlak an si thu khal theih a si. Ref: MG, DVB

 

LEAVE A REPLY

Please enter your comment!
Please enter your name here