Tulai Boruak 59: IRAN SAI BANNAK AH US LĂWNGPI THLENG

0
652

Iran Sāi Bannak ah US Lăwngpi Thleng:Tulai Iran le US karlak ah buainak a sosang vivo ih doawknak a thlen mai khal zum a si. Iran hin Israel nuai cimih le Nuclear bomb tuah peh dingin hro a suang leuh leuh. Trump cozah cun Iran hremnak cu na sinin a tuah ih Iran thawn sumdawnnak tuah pohpoh cu hrem ding khal a ti ruangah Iran hin America lole Israel sumdawnnak lole ralkap hmun tivek kap dingin a hro ve.

Curuangah America hin Persian Tikel ih lăwngpi hleiah USS Abraham Lincoln timi raldo vanzam tampi phur lăwngpi cu Israel ram kiang Meddterrenean tipi ah a thlah zo. Cun bomb thlaktu hminthang B-52 khal Amreica hawipi Saudi Arabia ramah an thleng thluh zo ti a si. Israel PM Natanyahu khalin, “Iran hin Neuclear bomb a tuah ziangti zin khalin kan siang lo ding” a ti ve. Ziang bang vivo hen kei maw?

Israel ah Trump Lâr: #Israel thlang lam ih Petah Tikva khawpi ih City Hall hmun cu US President Donald Trump ih hmin an bun ding thu khawpi uktu Mayor Rami Greenberg cu July 4 ah a phuang ih a awnnak puaiah US Ambassador to Israeli David Friedman le PM Benjamin Netanyahu khal sawm an si ding thu theih a si. #Transportation Minister Israeli Katz khalin Western Wall le Temple Mount karlakah Train Station an tuah dingih cucu Donald Trump Station an ti ding thu a rel fawn. #PM Netanyahu khalin Golan Heights hmun cu “Trump Heights or Trump Land” hmin a pek men thei thu a sim. Asilole khawpi an din dingih Trump hmin an pe ding. Israel ramah hin Trump hi a lar emem ih an Prime Minister Bejamin Natanyahu hnak hmanin a lar sawn. Trump duhtu hi 68% an si ti a si.

Democratic Hluttaw le Trump Acozah Beihawknak Sosang Vivo: March 24 khan Trump ih sualnak hawltu Robert Mueller le a hopawl mithiam 19 cun an thil hmuhsuah cahmai 448 ih sah cu Attorney General William Barr hnenah a pe lut zo. Cumi cu Barr in cahmai 4 in a tlangpi thu Senate le House Judiciarty Committee hotupawl hnenah a kuat. Cutawkah cun ‘Russia thawn ṭuantlangnak a um lo ti le Thuṭhennak khamnak a um lo’ ti a si. Cucu Democratic lamin a kim kan duh an ti ih an au cece.

Hi Report hi Hluttaw hnen ih ap a si loih AG William Barr hnenih ap a si tikah Hluttaw hnenah AG hin a duh le a pe thei, pe lo thei a si. Cuhleiah Trump thubuai tuahsak le tuahsak lo khal Hluttaw le ziang thuṭhennak thu hman si loin AG thu a si. Asinan AG Barr cun ka lo ap ding, asinan mipi theih ṭul lo mi thuṭhennak ṭawngkam le rampi thuthup thenfai ta a ṭul a ti. Hivek thianfai (redacted) loin tui hlan khalah an rak puangzar dah lo. Anmah Nancy Pelocy, Schummer, thuṭhennak kawmiti hotu Nedler pawl, 1998 ih President Clinton an rak zingzawi ṭumah ‘thianfai lo cun pholang lo ding’ tiih nasa takih ṭangtupawl khan tu ah cun ‘thianfai lo mi pholang ding’ ti rori in an au.

#AG Barr vs House Democrats: Senate ah AG Barr an ko. Report thenfai lo mi cahmai 448 cu siar theihin kawmiti office ah a ret. Asinan Democrat -pawl zohmanin an siar paih cuang lo. AG Barr hin dik lo takin Trump a ṭan an ti. Senate Judiciary Committee Chairman Lindsay Graham(R-SC) cun, “Barr a dik le dik lo cu hi report cahmai 448 a um ko si. Siar hmen uh” a ti ih an siar cuang fawn lo. House of Representatives in May 5 khan Barr cu Judiciary Committee ah an ko. Asinan Chairman Nedler cun Tlangsuak Upa lawng si loin Office hnaṭuantu danthiampawl thusuhter a tum ruangah AG Barr a ra duh lo. Vuanzi cu Hluttaw Palai pawl ih thusuh dan a si, asinan mi menmen suh dan a si lo. Asinan Democratic-pawl cun suhbuaiter an tum ruangah Barr a ra duh lo a si. Cucu Department check-and-balance tuahtu Oversight Committee palzut ah puhin thiamlo coter dingin vote an thlak zo. Hluttaw pi ah vote an pe leh ding. Democratic kawnṭhawl House ah hin thiamlocoter vote in a neh ding ti theih cia a si.

#House hin Thiamlocoter sehla Ziang a Cang Ding? Hihi an vote hlanah Trump cun Excutive Privillege (uktu hamṭhatnak) tiin thusuah a tuah. Culole hiti Thiamlocoter (Hold Contempt) a si ah cun a Committee hmaiah a va lang hlan lo thawng thlak ding a si. 2013 khan Obama ih AG Eric Holder kha hitivek a rak tawng zo. Asinan House in thiamlo a coter khal ah Inspector General in thubuai tuahsak le tuahsak lo ding thuthluknak a tuah lai ding. tu ih IG cu Michael E. Horowitz a si ih Obama in 2012 kumih a rak ruat mi a si. ziang tak bang pei maw? Hi ruangah Democratic lam an puarthaunak pakhat khal a si. IG in thubuai tuah ding a ti pang cu AG Barr cu thawng a tla thei. Asinan President ngaidamnakin a suaksal thei.

#Ziangruangah AG Barr hlawn ta rori an duh? William Barr hi George W. Bush san lai ih AG rak ṭuan zo a si. Midai, mihhnget, micak le midik a si. Sunkaw zahum khal an si. Trump ih AG a ṭuan hlan sung cu Conservative le Liberal lam khalih an fak mi a si. Asinan a hna a thei ih hnget takih a ṭuan thiam ruangah Democratic pawlin Jeff Sessions vekin an hro dai thei lo ruangah an hua thawk. Cun Clinton Email le Russia Collusion hi a thawk ihsin ka zingzawi sal ding a ti ruangah an ṭih a si bik. Hi lawng a si lo Democratic-pawl hi Dirty Politics an khel ti cu a fiang. Hitin an zahumnak kan tlakter dingih 2020 hrilawknak ah kan cak ding ti hi Dem-pawl an tumtahbik pakhat a si. Rep. Al Green (D) khalin, “Trump cu ziangvek dinhmun le a man pek khalin kan hlawn a ṭul. Culole 2020 ah hriltlin a si lala ding” a ti. Hi hin Democratic-pawl ngaidan a khaikhawmbik ih ruah a si. Ziang tak an bang vivo ding? US Politics cu a ngainuam vivo lai ding a bang e!!

Photo: Lawngpi & AG Barr. Salai Chin. Jed Zuala Cawnghlut wall post.

 

LEAVE A REPLY

Please enter your comment!
Please enter your name here