UFC Former Cham Miesha Tate cu ONE Championship ah

0
1051

MMA khawvel ah kan Laimi in kan theih laar zetmi le Myanmar ram pumpi khalih laar zet Aung La Nsang ih thongnak hmun, Asia khawmual ih MMA promotion tumbik ONE Championship ah Vice President dinhmun ṭuan dingin UFC ih Women’s Bantamweight Champion hlun Miesha Tate cun lungkimnak a nei, tiah ONE Champion CEO Chatri Sityodtong cun tuisun ah a puang ta riai.

Miesha Tate in ONE Championship ih a lut/ṭuan ding thu hi ONE Championship ih CEO Shatri Sityodtong cun Social media (Twitter) parah a tarlang. “Ka rualpi ṭha Miesha Tate kan hmuak kei uh! Miesha hi leitlun thuanthu ah nunau MMA ih mi maksabik a rak si dah a si. Hipawl tlun ah Miesha hi thinlung tlaitluang zet neitu a si. 2019 kum thokah Singapore ah ra ṭhawn in ONE Championship Vice President dinhmun la ding a si” tiah a tarlang.

Miesha Tate khal cun ONE Championship a kawp thuthawn pehparin, “Vice President dinhmun si dingin ONE Championship ka run kawp ngah hi ka lungawi ngaingai a si. Hi an tumtahmi hi hlawhtlinter ding rori ka duhsak a si. UFC ah leitlun huap nunau ih “World Champion” ka rak sinak ih ka tawntehmi pawl le theihmi pawl cu nauta sawn pawl an ṭhanso theinak dingih hman ṭangkai ka duh a si. Singapore ih ṭhawn lohli ding hi ka hngakhlap zetih Asia ram fankual ding khal ka cak zet a si,” tiah a sim vethung.

Tufangte hi ONE Championship le UFC hi an minung an thlengaw rero ih, ONE Championship in UFC Lightweight Champion hlun Eddie Alvarez an lakluh hnu reilote ah UFC thotho ih Flyweight champion hlun Demetrious Johnson khal an lalut bet. ONE Championship hin UFC ih Champion hlunpawl an lalut rero ti lai ah, ONE Championship ah Welterweight Champion hlun Ben Askren cun UFC a kawp vethung.

ONE Championship hi Singapore ah hmunkhuar in July 14, 2011 ah Chatri Sityodtong le ESPN Star Sports ih senior executive Victor Cui tei’ pahnih in an rak dinsuakmi a si. ONE Championship ih lekawknakpawl cu Muay Thai, Kickboxing, Boxing, le pomtarh awk leknak pawl an si.

Miesha Tate hi MMA leknak lamlawng siloin Modeling lam khalah hmelṭha le ruangrai ṭha tak a si. Magazine Cover hrang tivek le a phunphun ah a lang tam zet. Amah hi mi thinlung tlaitluangte a si. UFC 168 ah Ronda Rousy thawn an thongawknak khalah nuncan mawi zetin acangvai ih mipi ih lawm a hlawh zet.

Miesha Tate UCF World Champion a ngahnak VIDEO; Holly Holm vs Miesha Tate

Miesha Tate Singapore a tlawnnak Video;

 

LEAVE A REPLY

Please enter your comment!
Please enter your name here