US MIDTERM ELECTION RESULT: Republican in Senate an Uk, Demmocrats in House an Uk

0
434

Midterm Election: US President hril hnu kum 2 ah laiak hrilawlnak an nei ṭheu. Tui ṭum hrilawknak ah Senate 100 lakah 34, House of Representatives 435 an zate le State Governor 36 hrang hrilawknak tuah a si. Cuhlei State Asssemble 87 ih MLA khal hril an si.

Hrilawknak Thupi: Tui ṭum hrilawknak hi US hrilawknak hmuahhmuah hnakin a thupibik ih ruah cio a si. A san cu Conservative le Liberal doawknak a nat tuk ruangah a si. Democratic-pawlin House le Senate an uk thei a si ahcun Trump hlawn dingin hma an la hngal ding ti an sim ṭheu ruangah Trump khal cu vote hawlin a tawivak ciamco ih hmun 30 leng loah campaign a tuah.

Republican lam lawng si loin President hlun Obama khal a zuam nasa. Trump le Obama cun, “Ka dam sungih hrilawknak thupi bik” an ti veve. Trump hlawn ding cun House ah vote tam sawn le Senate ah ṭhen thum ṭhen hnih thawn lawng hlawn a theih. Senate ah Trump party in member 3 an neih bet deuhdeuh ruangah hlawn lam cu nai lo nasa.

An Nehawk Dan: Tu ah Senate ah Rep. 51-49 Dem. An si ih tu rizal suak zo ah Rep. 51- 45 Dem( + 2 Independets) a si ih 3 rizal a suak hrih lo. (President hlawn ding cun Democratic-pawlin vote 67 an neih a ṭul) Tu Senate lai aiin Republican lam an caksin ruangah vuanzi le thuṭhentu tivek Senate nemhngeh ṭul pawlah President hrang hnaṭuan a awl sawn ding.

Asinan House rizal suak zo mi ah Dem 222- 199 Rep a si. Democrat-pawl in House an uk ruangah Trump tumtah vekih dan tuah cu a har sin ve ding. Cun Trump thiltidan an duh lo mi a um le House Sub-Committee in koin thu an sut thei thlang ding. President ngai cu an sut thei lo nan a aiawh zo simaw talih a va relfeng a ṭul. US State Governor 50 ah Rep 33-16 Dem le Independent 1 hi ṭuan rero lai an si. Asinan hrilawknak ah tu rizal puan zo mi ah Rep 24-20 Dem in Republican an tam deuh lai.

Thuanthu Nei Tūm: Tui ṭum hrilawknak ih thuanthu nei tambik cu Texas ih Ted Cruz(R) le Beto O’Rouke (D) an si. Ted Cruz hi ṭuan lai a si ih 2016 President tiang rak cuhtu a si. Beto hi Rock Singer a si ih Holiwood, Celeberties le Media pawlin an ṭanpi nasa. Campaign fund hman 70 million leng lo a ngah. Hi hi thuanthu ih tambik a si, an pahnih kawmin Million 100 leng lo a si.

Media pawl cun mipi ngaidan laknak Poll ah Cruz a man lo cingin Beto tling ding vekin an ngan ciamco. Asinan Ted Cruz in a neh thotho. A dang leh cu Florida Governor le Senator an si ih Media le Poll pawl cun Democratic ihsin Senator ṭuan lai Nelson cun GOP Rick Scott neh ding le Gilum (D) cun Desaintis(R) neh dingin an ngan nan vote maltein an sung veve. Senate cuhawknak ah hin Swing State an ti mi awn lam nei tuk lo ah hin Republican lamin nehnak an co nasa.

Judge Kanavaugh Vote Lo Ruangah: Kan dung thla ah khan Us Supreme Court nominee Conservative Judge, mifel hminthang Brett Kanavaugh thuhla kha Tulai Boruak ah kan ngan nasa zo. Democratic pawlin thuphan puh ih hlawn an tum ruangah Republican mipi tampi an thinheng nasa. 2016 kumih Trump nehnak State pawl ihsin Senator 3 cun an vote ding maw vote lo ding an áwláwk a sáwng nasa a si kha.

West Virginia ihsin Sen. Machin (D) cun fim takin a vote ruangah hriltlinsal a si. Asinan Indiana Sen. Donelly(D) le N. Dakota Sen. Heidi Heitkamp(D) cun Kanavaugh an vote lo ruangah mipi vote hmangih hlawn an tuar a si. Tenessee khalah Trump ṭantu Marsa Blackburn cun Democratic milar Phil Bredesen cu zaithiam Tailor Swift in a ṭanpi cingin a neh a si.

#Trump cun tu hrilawknak cu “Nasa takih hlawhtlingnak” a ti. House an neh vaih cun Speaker ṭuan tum ṭengṭengtu Nancy Pelosi (D-California) khalin nehnak an co ruangah ‘thaisun ihsin thil a danglam ding’ a ti ve. America ah cun bukawtawn she tiin President tling lo party an vote ṭheu ruangah Obama khal khan 2010 ah Seat 60 leng lo le Clinton khanlin 1994 ah seat 55 lai an rak hloh ve. Trump hin 24 hrawng a hloh men thei.

Kahtaphuatin November 5 zan Mossuari ih Trump a campaign laiah nupinu pakhat lungcimitin a tlu. An buaipi laiah mipi in, “Amazing Grace” timi hla sak rual ṭhupṭhoin Pathian an thangṭhat. Hi hla hi Mizo cun, “Khawngaihna mak mawi leh duhawm” ti a si ih Laimipawl lakah cun, “Haleuija, Haleluija” ti ih sak tla an um.

Hivial hi si hrih sehla, Kan ram special election (By-election ti lo ding a si nan) hnakin peng thawng tampi hlatnak US lam kan ngaihven sawn a si hi… Photos: Trump, Ted Cruz le Nancy Pelosi. Thulaknak, U Jed Zuala Cawnghlut ih Facebook Wall post ta laksawngmi a si.

 

LEAVE A REPLY

Please enter your comment!
Please enter your name here