Ziangruangah Messi In Barcelona A Suahsan Siang Lo Timi Rak Fiang Ve Aw

0
434

Barcelona captain Leo Messi hi mi tampi cun leitlun bawhlung sit thiambik ih an pom a sinan, team dang hman a thawn ngam lo, a tihhrut tuk tiih relsiat a hlawh theu. Asian, a thuanthu theifiangtu pawl cun Messi hi team dang hman thawn ngam lo tiin an relse ngam lamlam lo. Ziangahtile kan Pupa tong khalah ‘ Rawl a lo petu kut keu hlah’ timi a um. Cuvek in Messi khal a nauhak lai ihsin natsia nei a si ih zohman in an rak duh lo, an tuamhlawm duh lo. Asinan,Barcelona club in sumpai tampi cem in an tuamhlawm ih tui dinhmun a thlen phah. A nunnak vek ih thupi Barcelona cu amai thuhte suahsan ngam ding ci a si lo lawlaw.

A thuanthu cu siar hnih awla , na relse ngam nawn lo nasa ding: Leonal Messi hi 1987 kum June 24 ah Argentina khua pakhat Rosario ih suak a si . An khua cu bawhlung sit paihzet an si ruangah Messi khal kum 5 mi a si in bawhlung a sit thok zo. A pa”i Coach tuannak team ah a lek ve ih bawhlung sit a thiamzet nan, midang aiin a niam ih a tawisawn cu mipi hmuhsuam a tonnak bik a si theu.

Cutin mite zet si cingin rualpi lak ahcun bawhlung a sit ve theu ih thiambik a si ringring .Asinan kum 11 a kim tikah a thangthei cuang silo ,a Nu le Pa an mangbang ih sizung an zohter cu thanthei lonak natsia a rak nei . A Nu le Pa cun an neihsun thawn an fapa cu sizung ah an hlawm rero nan thatlam a pan thei lo ih thinphang riahsia in an um.

Cuti kum 3 sung rori a Nu le Pa in an zing rero khalih thatlam a pan thei lo ruangah an sumpai khal in a daih nawn lo ih zingnak ding sumpai ah an buai . Damlo cingin bawhlung cu a sit thotho ih an club ih lek thabik a si ringring nan, a lehnak club cun Messi tuamhlawmnak ding sumpai an tumsak thei lo tlunah Messi hrang sumpai heu an sian lo thu an simthei .

Cutik ah Messi tei sungkua cu thinhar riahsia in an um ih Messi tuamhlawm dan ding sumpai khal an nei nawn lo. Asinan, an hrang ni-eng mawi a suak ve, Spain club tha Barcelona cun Messi thuhla an rak thei ih an khua ah feh in a lehdan an va zoh . Bawhlung a thiamdan an hmuh tikah an hnenih lek dingin an duhzet ih a natnak khal cohlang in a dam tiang tuamhlawm an huam thu a Nu le Pa an simthei .

Cutin A Nu le Pa Khal in Barcelona ih dawrnak cu an cohlang ih kum 13 a ti ah Messi cu Barcelona a lut . Natsia nei lai a si ih sizung a feh man ,a sii man le sibawi tuahhlawm man hmuahhmuah cu a kum tel in Barcelona in an tumsak ih kum tam a liam hlanah Messi khal damcak zetin bawhlung a sit theisal.

Kum 17 a ti cun Barcelona upa hrang a lek thei thlangih Kum 17 si cingin Barcelona hrang a sit goal hngehnge . Barcelona hrang sit goal thei nauhak bik hminsin tuahtu a si ih kum 22 a ti cun leitlun bawhlung sit thiambik hnenih an pek theumi Ballon d’Or khal record hmat thawn a dong tariai .

Messi cun ” Barcelona hi ka ziangkim an si ih kan parih an thatnak hi ziangtik hmanah ka theihhngilh dah lo ding , anmah in suak aw ,kan lo duh nawn lo inti hlansung cu Barcelona hrang ka lek ringring ding a si ,” a ti .

Curuangah ziang thei loin Messi in Barcelona a suahsan ngam lo tiin rak au ek’oo nawn hlah, Hlan pupa hma in rawl petu kut keusak an duh ve lo a si.

LEAVE A REPLY

Please enter your comment!
Please enter your name here