ZUMTUPAWL THEIH TENGTENG DING THUTHANG (News Anylsis)

0
593

Tulai Boruak kan ngan tikah thuthang menmen ngan loin Khristianpawl theih tul tengteng mi thuthang hliakhlainak ka ngan tlangpi. Hi kan thutheih mi hin kan zumnak tihnget ih leitlun thil umzia kan thlir thiam beisei ih ngan a si. International politics, ramsung politics le thuthang tampi cu kan zumnak thawn a pehparawk lo ruangah ka ngan dah lo. Cupawl cu Media-pawl ngan dingah ka ret a si. Tui tumah kan theih tengteng ding thuthangpawl cu hun tarlang sehla.

 

1. BIBLE NGANSAL DING MAW?: Mizan sun ah khan America ram Episcopalian (Anglican) Church Conference cun Pathian cu ‘Pa’ tiih ko nawn lo dingin le ‘Pa’ khal si lo ‘Nu’ khal si lo, ‘Lailak- Neutral Gender) a si tiin thutluknak an tuah ta riai! Hi thu hi Conservative TV Talkshow tuah theutu cun, Bible ngansal tumnak a si” a ti. Pope Faracis in, “Biblehi san a man nawn lo ngansal a tul” a ti mi khal a takin an hmang tan thlang khal a bang. Fox News cun, “Pathian cu Pathian kan siter kei uh(Let’s let God to be God)” tiin Anglican thutluknak cu a sawisel ve.

 

Anglican-pawl hi NU covo humhalhpawl le Milai covo hmaisawng ruangih hivek tuah an si. Breibert News cun, “Mi thin nuamloter an phan ruangah biakinn sungah sual le hremhmun rel an kham, Neih Bangaw thu rel an kham, asinan biakinn khawmtu an mal deuhdeuh. Tu ah Nunau thinnuamloter an phan ruangah hitin an rel ih biakinn an khar bet lai ding. Biakinn sungah cun Bible zirhnak vek rel hi a thabik” tiah a rak ngan dah.

#Hi hin Liberal zirhnak le milai covo uar a tihnunzia kan theithiam mai ding ka zum.

2. PRAY FOR 45: Tui zing thuthang lar zet pakhat cu Evan. Franklyn Graham in Kawr tuahin a dungah, “Pray for 45” ti a ngan ih a pa Billy Graham Library ah a phosuak. Hi hi President Trump hrang zumtupawl thlacamsak dingih a dilnak a si. Hi hi 1 Timothe 2:2 ih, “Siangpahrang le thuneitupawl hrang thlacam uh” timi ah thumaw ih a tuah mi a si. Franklyn Graham cun, “America ruahsannak cu Pathian lawngah a um. Curuangah kan ram hruaitupawl President ihsi thawkin thla kan camsak hi kan ti ding a si” a ti. Tu naite ah Wallmart in, “Impeach 45” –President Hlawn Uh” timi T-Shirt an phosuak ih Conservative lamin an dodal cece ruangah an retsal. Kannih kan kan President U Win Myint le Cabinet-pawl, MP pawl, Ralbawipawl, CM le CAM pawl hrang thlacamsak hi kan ti ding a si.

 

3.    JERUSALEM AH EMBASSY THAWN TUM: Europe ram pakhat a si mi Slovekia ram cun Jerusalem cu Israel khawpi a si pawmpi in Embassy Jerusalem ih thawn an tum timi thuthang a suak. Trump in Jerusalem cu Israel khawpi ih a pawm hnu a dungthluntu ram 6 nak a si ding.

 

4. THUTHANGTHA SIMTU PHUNGKI LUTSAL: Kawl thuthangtha sim thiam zet pakhat a si mi Dr. Paing Soe cu July 5 ah Phungki a lutsal timi thuthang theih a si. Anih hi Khristian a sinak a reipi zo ih Bible tla zirin dikari tiang ngahtu a si. Kawl nunphung le Buddha zirhnak thei zettu a si ih kei khal a zirhnak ngai ding rori in Tahan ah ka hung dah. A thusim Video tla ka zoh hnuaihni. Thuthangtha a sim rero hnu ah a tlusia ih tawkfang cu a hlo. Cun a nupi fanau tlansan ih Karen fala Esther timi thawn an neiaw ih a nupi inn ah a um. Tu hi a nupi thawn an to-aw ih umnak ding neih lo ruangah Phungki ih lut a si thu nau vek rori ih a zoh mi Saya Myo Chit in a rel. Hi thu ah ngaidan tampi a suak: “A piangthar taktak lo a si ding’ ‘A pacang lo em mai’ ‘A tluse ngah’” tivekin ngaidan tampi a um. An zaten a si thei theh.

 

#Zumtu zokhal amah vek cekci kan si lo hmanah kan tluse thei thluh. Harsatnak pittawp kan tawn hmanah Bawipa ih tlukluh hi a thabik ding. Cun piangthar taktak lo khalin lar zetin rawng a bawl theih. Cun picang tukih canagvaih hnu ah tangdawrtei rawngbawl kan harsat tikah thutluknak atthlak tak khal neih a theih. “Thingtum cu tidai sungah kum 20 a um hmanah Tisartam ah a cang cuang lo” a timi hin ruahnak tampi a suahter. Khrisrian ah kum 20 lai ka um nan Khristian ka si cuang lo a tinak maw Phungki ah kum tampi um hman ningla Khristian ka si thotho a tinak ha maw si ding. A tumtah kan thei lo nan Phungki ah a lut ta phawt cu a si. Hi hi kan zate hrangah ralrin peknak dar a si.

 

# Bible cun TULAI THIL UMDAN kan theih ruangah harhvang le fimkhur zetih nung dingin le sualnak salih tang loih Khrih thawn thuamaw sawn dingin in zrh a si kha. Rom 13:11-14

Ref: Jed Zuala Cawnghlut ih Wall Post mi a si.

 

LEAVE A REPLY

Please enter your comment!
Please enter your name here